Shavkat Mirziyoyev Rosatom davlat korporatsiyasi bosh direktorini qabul qildi

Oʻzbekiston Prezidenti Shavkat Mirziyoyev 23-oktabr kuni “Rosatom” davlat atom energiyasi korporatsiyasining bosh direktori Aleksey Lixachyovni qabul qildi. Prezident matbuot xizmatining xabariga koʻra, uchrashuvda Oʻzbekistondagi birinchi integratsiyalashgan atom elektr stansiyasi loyihasini amalga oshirish hamda ilgʻor texnologiyalar va bilimlarga asoslangan tegishli infratuzilmani rivojlantirish masalalari muhokama qilingan.

Qayd etilishicha, birinchi reaktor binosining poydevorini qurish va AESni loyihalash ishlari izchil davom etmoqda. Soha uchun malakali kadrlar tayyorlashga alohida eʼtibor qaratilgan, jumladan, Milliy tadqiqot yadro universiteti “MIFI”ning Toshkent filiali hamda “Rosatom” kompaniyasi obyektlari imkoniyatlaridan foydalanish nazarda tutilgan. Shuningdek, kelajakdagi AES yonida energiya tejamkor uy-joylar, zamonaviy taʼlim, tibbiyot va sport muassasalari hamda aholi uchun qulay ijtimoiy infratuzilmaga ega “atomchilar shaharchasi” qurish boʻyicha hamkorlik istiqbollari ham koʻrib chiqilgan.