Oʻzbekistonda Toshkent va atrofdagi tumanlardagi issiqxonalar uchun yangi ekologik talablar

Oʻzbekistonda Toshkent shahri va atrofdagi ayrim tumanlardagi issiqxonalar uchun maxsus ekologik rejim joriy etiladi. Bu haqda Adliya vazirligi Vazirlar Mahkamasining 22 oktyabrdagi 586-sonli qaroriga tayanib xabar berdi. Maxsus rejim hududiga Toshkent shahri hamda Toshkent viloyatidagi Yuqorichirchiq, Qibray, Yangiyoʻl, Zangiota va Toshkent tumanlari kiradi.

Bu hududdagi issiqxonalar isitish uchun tabiiy va suyultirilgan gaz, elektr, geotermal va quyosh energiyasi hamda issiqlik elektr stansiyalarida hosil boʻladigan ikkilamchi issiqlikdan foydalanishi mumkin. Koʻmir, briket va biomassa peletlaridan foydalanadigan issiqxonalar isitish tizimlarini 2026-yil 1-dekabrgacha ushbu manbalarga oʻtkazishi shart. Barcha ekologik talablar bir vaqtda bajarilsa, qattiq yoqilgʻidan foydalanishga ruxsat beriladi. Qozonlarda yoqilgʻi berishni avtomatik boshqarish tizimi, chang va gazni tozalash uskunasi, uzluksiz monitoring tizimi hamda muvofiqlik sertifikati boʻlishi kerak.

Issiqxonalarda shinalar, bitum, mazut, plastik va polimer plyonkalar, ishlatilgan moylar hamda maishiy va ishlab chiqarish chiqindilarini yoqilgʻi sifatida ishlatish qatʻiyan taqiqlanadi. Davlat byudjeti 2028-yil 1-yanvargacha uskunalar xarajatining 50 foizini qoplaydi; bir gektarga subsidiya 50 mln soʻmdan oshmaydi. Talablarga javob bermaydigan issiqxonalarga 2026-yil 1-dekabrdan davlat ekologik ekspertizasining ijobiy xulosasi berilmaydi. Nazorat har yili 15-oktyabrdan 15-martgacha oʻtkaziladi.