Özbəkistanda Daşkənd və ətraf rayonların istixanaları üçün yeni ekoloji tələblər

Özbəkistanda Daşkənd şəhəri və ətraf bəzi rayonlardakı istixanalar üçün xüsusi ekoloji rejim tətbiq olunacaq. Bunu Ədliyyə Nazirliyi, Nazirlər Kabinetinin 22 oktyabr tarixli 586 nömrəli qərarına istinadən açıqlayıb. Xüsusi rejim sahəsinə Daşkənd şəhəri və Daşkənd vilayətinin Yuxarı Çirçik, Qibray, Yanqiyol, Zəngiota və Daşkənd rayonları daxildir.

Bu ərazilərdəki istixanalar istiləşmə üçün təbii və maye qaz, elektrik, geotermal və günəş enerjisindən, həmçinin istilik elektrik stansiyalarının ikincili istilik enerjisindən istifadə edə biləcək. Kömür, briket və biokütlə peletləri ilə istiləşən istixanalar isitmə sistemlərini 2026-cı il 1 dekabra qədər bu mənbələrə keçirməlidir. Bütün ekoloji tələblər eyni vaxtda yerinə yetirilərsə, bərk yanacağın istifadəsinə icazə veriləcək. Qazanlarda avtomatik idarəetmə sistemi, toz və qaz təmizləmə avadanlığı, davamlı monitorinq sistemi və uyğunluq sertifikatı olmalıdır.

İstixanalarda təkərlər, bitum, mazut, plastik və polimer təbəqələr, işlənmiş yağlar və məişət və istehsalat tullantılarını yanacaq kimi istifadə etmək qadağandır. Dövlət büdcəsi 2028-ci il 1 yanvara qədər avadanlıq xərclərinin 50 faizini ödəyəcək; hektara düşən subsidiya 50 milyon somu keçməyəcək. Tələblərə cavab verməyən istixanalara 2026-cı il 1 dekabrdan dövlət ekoloji ekspertiza müsbət rəyi verilməyəcək. Yoxlamalar hər il 15 oktyabr - 15 mart tarixləri arasında aparılacaq.