Oʻzbekiston Markaziy banki islomiy moliyada murobaha standartini joriy etishni taklif qildi

Oʻzbekiston Markaziy banki islomiy bank faoliyatida murobaha operatsiyalarini amalga oshirish tartibini belgilovchi mamlakatning birinchi islomiy moliya standartini tasdiqlashni taklif qilmoqda. Qaror loyihasi 22-oktyabr kuni jamoatchilik muhokamasiga qoʻyildi, fikrlar esa 1-noyabrgacha qabul qilinadi. Hujjat qabul qilinsa, rasmiy eʼlon qilingan kundan kuchga kiradi.

Hujjatga koʻra, murobaha moliya muassasasi tovarning dastlabki qiymati va unga qoʻshilgan ustamani mijozga maʼlum qilgan holda sotishi, shu jumladan nasiyaga sotishi orqali moliyalashtirish usulidir. Bank mijoz soʻragan tovarni avval oʻz mulkiga sotib olishi shart, mulkiga olmasdan murobaha shartnomasini tuzishi taqiqlanadi. Ustama shartnomada alohida koʻrsatiladi, qatʼiy summa yoki foiz sifatida belgilanadi va keyinchalik oʻzgartirilmaydi.

Loyihada kechiktirilgan toʻlov uchun qoʻshimcha haq undirish hamda moliyalashtirish uchun alohida komissiya va yigʻimlar taqiqlanishi taklif etilmoqda. Shartnomada neustoyka nazarda tutilishi mumkin, ammo bu mablagʻlar bank daromadiga aylantirilmay, alohida hisobvarakda yuritilib, mijoz nomidan xayriya maqsadlariga yoʻnaltirilishi kerak. Oltin, kumush va valyutalarni nasiyaga murobaha asosida sotish ham taqiqlanadi.