Özbəkistan Mərkəzi Bankı islami maliyyədə Murabaha standartının tətbiqini təklif edir

Özbəkistan Mərkəzi Bankı islami bank fəaliyyətində Murabaha əməliyyatlarının icra qaydasını müəyyən edən ölkənin ilk islami maliyyə standartının təsdiqlənməsini təklif edir. Qərar layihəsi 22 oktyabr tarixində ictimai müzakirəyə çıxarılıb, rəylər isə 1 noyabra qədər qəbul olunacaq. Sənəd qəbul edildiyi təqdirdə rəsmi elan olunduğu gündən qüvvəyə minəcək.

Layihəyə görə, murabaha maliyyə təşkilatının malın ilkin dəyərini və əlavə olunan marjanı müştəriyə bildirərək satdığı maliyyələşdirmə üsuludur; bura nəsiyyə ilə satış da daxildir. Bank müştərinin istədiyi malı əvvəlcə öz mülkiyyətinə almalıdır və malın mülkiyyəti olmadan murabaha müqaviləsi bağlaya bilməz. Marja müqavilədə ayrıca göstəriləcək, sabit məbləğ və ya faiz kimi müəyyən ediləcək və sonradan dəyişdirilməyəcək.

Layihə həmçinin gecikmiş ödənişlərə görə əlavə haqq alınmasını və maliyyələşdirmə üçün ayrıca komissiya tutulmasını qadağan edir. Müqavilələrdə gecikmə cəzası nəzərdə tutula bilər, lakin bu vəsaitlər bank gəlirinə çevrilmir və ayrıca hesabda saxlanaraq xeyriyyə məqsədlərinə yönəldilməlidir. Qızıl, gümüş və valyutaların nəsiyyə murabaha ilə satışı da qadağan olunur.