“Oʻzbekiston ehtiromi” ordeni taʼsis etiladi

Oliy Majlis Qonunchilik palatasining navbatdagi majlisida “Oʻzbekiston ehtiromi” ordenini taʼsis etish toʻgʻrisidagi qonun loyihasi koʻrib chiqildi. Yangi davlat mukofoti xorijiy davlat fuqarolarining Oʻzbekiston oldidagi alohida xizmatlarini eʼtirof etishga qaratilgan.

Matnda taʼkidlanganidek, Oʻzbekistonning ochiq, pragmatik va oʻzaro manfaatli tashqi siyosati natijasida xorijiy davlatlar va xalqaro tashkilotlar bilan siyosiy, savdo-iqtisodiy, investitsion, madaniy-gumanitar va boshqa sohalardagi hamkorlik izchil kengayib bormoqda. Strategik sheriklik munosabatlari mustahkamlanmoqda, yirik investitsiya va infratuzilma loyihalari amalga oshirilmoqda, savdo aloqalari rivojlantirilmoqda.

Loyihaga koʻra, orden ikki darajada boʻladi. “Oliy darajali Oʻzbekiston ehtiromi” ordeni bilan xorijiy davlat va hukumat rahbarlari, xalqaro tashkilotlar rahbarlari hamda xorijiy davlatlarning atoqli davlat va jamoat arboblari mukofotlanadi. Shuningdek, orden bilan xorijiy jamoat arboblari, yirik kompaniyalar rahbarlari, elchilar va insonparvarlik hamda xayriya faoliyati bilan hissa qoʻshgan xorijiy fuqarolar mukofotlanadi. Deputatlar loyihani qabul qilib, Senatga yubordi.