“Özbəkistan ehtiramı” ordeni təsis ediləcək

Özbəkistan Oliy Məclisinin Qanunvericilik Palatası növbəti iclasında “Özbəkistan ehtiramı” ordeninin təsis edilməsi barədə qanun layihəsinə baxdı. Yeni dövlət mükafatı xarici vətəndaşların Özbəkistan qarşısında xüsusi xidmətlərini tanımağa yönəlib.

Mətndə qeyd edildiyi kimi, Özbəkistanın açıq, praqmatik və qarşılıqlı faydalı xarici siyasəti nəticəsində xarici dövlətlər və beynəlxalq təşkilatlarla siyasi, ticarət-iqtisadi, investisiya, mədəni-humanitar və digər sahələrdə əməkdaşlıq davamlı şəkildə genişlənir. Xarici dövlətlərlə strateji tərəfdaşlıq münasibətləri möhkəmlənir, iri investisiya və infrastruktur layihələri həyata keçirilir, ticarət əlaqələri inkişaf etdirilir.

Layihəyə görə, orden iki dərəcədə veriləcək. “Ali dərəcəli Özbəkistan ehtiramı” ordeni xarici dövlət və hökumət başçılarına, beynəlxalq təşkilatların rəhbərlərinə və görkəmli dövlət xadimlərinə təqdim olunacaq. Ordenlə həmçinin xarici ictimai xadimlər, iri şirkətlərin rəhbərləri, səfirlər və humanitar və xeyriyyə fəaliyyəti ilə töhfə verən xarici vətəndaşlar təltif olunacaq. Deputatlar layihəni qəbul edərək Senata göndərdilər.