Toshkentda 2030-yilgacha 400 ta mahalla kompleks yangilanadi

Toshkentda “15 daqiqalik mahalla” tamoyili asosida 2030-yilgacha 400 ta mahallani kompleks yangilash rejalashtirilmoqda. Bu haqda Prezident Shavkat Mirziyoyev ishtirokidagi taqdimotda maʼlum qilindi. Rejaga koʻra, 2027-yilda 100 ta, 2030-yilgacha esa jami 400 ta mahalla yangilanadi. Ishlar issiqlik, ichimlik suvi, kanalizatsiya, elektr, gaz va yoritish tizimlari, koʻp kvartirali uylar fasadlari, yoʻllar, bolalar va sport maydonchalarini qamrab oladi. Aholi jon boshiga toʻgʻri keladigan daraxt va butalar soni xalqaro standartlarga moslashtiriladi.

Loyiha doirasida 2030-yilgacha 400 ta mahallada 130 ming yangi ish oʻrni yaratiladi, shundan 22 mingtasi 2027-yilda yangilanadigan 100 ta mahallada tashkil etiladi. Banklar “konveyer” loyihalarni ishlab chiqish va ishga tushirish tizimini yoʻlga qoʻyadi. Taqdimotda Yashnobod tumanidagi Vatandosh, Mohinur, Al-Buxoriy va Tong mahallalari ham koʻrib chiqildi. 75 gektar maydonli hududda 18 ming 386 nafar aholi istiqomat qiladi. Rejalashtirilgan obyektlar orasida uch kilometrlik sayr yoʻlagi, koʻp tarmoqli sport inshooti, jami 540 oʻrinli toʻrtta bogʻcha va uchta poliklinika bor.

Shuningdek, Toshkentda 2025–2026-oʻquv yilida maktablardagi oʻquvchi oʻrinlari tanqisligi 141 ming nafarni tashkil etgani maʼlum qilindi. Keyingi besh yilda oʻquvchilar soni 71 ming nafarga koʻpayishi hisobiga bu koʻrsatkich 2030–2031-oʻquv yiliga borib 212 mingga yetishi mumkin. Shu sababli 2030-yilgacha poytaxtda 126 ming qoʻshimcha oʻquvchi oʻrni yaratish rejalashtirilgan: shundan 48 mingtasi respublika byudjeti, 78 mingtasi mahalliy byudjet hisobiga.