Misr Oʻzbekiston fuqarolari uchun kirish qoidalarini qatʼiylashtirishni kechiktirdi

Misr Oʻzbekiston fuqarolari uchun yangi kirish qoidalarini 2027-yil 1-martga qadar kechiktirdi. Bu haqda Oʻzbekiston Tashqi ishlar vazirligi matbuot kotibi Omonulla Fayziyev xabar berdi. Qoidalar dastlab 2026-yil 1-noyabrdan joriy etilishi rejalashtirilgan edi.

Fayziyevning soʻzlariga koʻra, kechiktirish Oʻzbekiston Tashqi ishlar vazirligi va Misrdagi elchixona tomonidan Misr hukumati bilan olib borilgan muzokaralar natijasida kelishib olingan. Yangi qoidalar kuchga kirguniga qadar Oʻzbekiston fuqarolari Misrga mavjud shartlarda sayohat qilishlari mumkin.

Rejalashtirilgan talablarga koʻra, Sharm el-Sheyx va Sinay yarim orolining boshqa hududlariga borish uchun oldindan viza rasmiylashtirilishi hamda sayohat turoperatorlar orqali tashkil etilishi kerak edi. 40 yoshgacha boʻlgan turistlar uchun oila aʼzolarining hamrohligi va yetarli mablagʻ mavjudligi ham nazarda tutilgan edi. Vazirlik fuqarolarni chet elda mamlakat qonunlariga, viza va migratsiya qoidalariga rioya qilishga, mahalliy anʼanalar va jamoat tartibini hurmat qilishga chaqirdi.