Tokayev Qozogʻistonda boylar uchun soliq stavkasini oshirishni taklif qildi

Qozogʻiston prezidenti Qosim-Joʻmart Toʻqayev boylar uchun soliq stavkasini oshirishni taklif qildi. U bu haqda 28-oktyabr kuni xalqqa qilgan murojaatida maʼlum qildi.

Toʻqayev murojaatida soliqqa tortishning adolatliligi masalasiga toʻxtaldi. U yirik mulk egalari uchun oshirilgan stavkani joriy etishni muhokama qilish vaqti kelganini aytib, hech kim qonuniy yoʻl bilan orttirilgan aktivlarni cheklamoqchi emasligini taʼkidladi. Uning soʻzlariga koʻra, bu Konstitutsiyaga zid boʻlardi, chunki gap adolat haqida bormoqda.

Prezident har bir fuqaro mamlakat taraqqiyotiga imkoniyatiga yarasha halol hissa qoʻshishi lozimligini aytdi. Hukumat va Qurultoyga ushbu masalani oʻrganib, takliflar kiritish topshirildi. Toʻqayev adolatli soliqqa tortish shaffoflikni, yaʼni toʻliq raqamlashtirishni talab etishini taʼkidladi, soliq yigʻimini oshirish, yashirin iqtisodiyotni qisqartirish va korrupsiya xavfini kamaytirish uchun esa sunʼiy intellekt kabi ilgʻor texnologiyalardan foydalanish zarurligini qayd etdi.