Mirzoyan: Janubiy Kavkazdagi tinchlik mintaqa tashqarisiga ham foyda keltirishi kerak

Armaniston tashqi ishlar vaziri Ararat Mirzoyan Bahraynda oʻtkazilgan "Manama dialogi" forumining yakuniy panel muhokamasida Janubiy Kavkazda eʼlon qilingan tinchlikning faqat mintaqa davlatlariga emas, balki mintaqadan tashqaridagi davlatlarga ham aniq harakatlar va real natijalar bilan foyda keltirishi kerakligini aytdi. Uning fikricha, mintaqa tajribasi uzoq davom etgan qarama-qarshilik qanchalik qimmatga tushishini va diplomatiya qanday imkoniyatlar yaratishini koʻrsatadi.

Mirzoyanning fikricha, Ozarbayjon va Armaniston oʻrtasidagi hamkorlik tamoyillari uzoq muddatli tinchlik va xavfsizlikka aylanishi kerak. U temir yoʻl, elektr energiyasi, optik tola, neft va gaz infratuzilmasini qamrab olgan TRIPP ("Tramp yoʻnalishi") loyihasining ahamiyatini taʼkidladi. Vazirning soʻzlariga koʻra, loyiha faqat Boku va Yerevan hamda bevosita qoʻshni davlatlar oʻrtasida emas, balki Sharq va Gʻarb, Shimol va Janub oʻrtasidagi aloqalarni mustahkamlashda ham muhim rol oʻynaydi.