Mirziyoyev: Oʻzbekiston 287 ming fuqarosini 34 ta davlatda ishlashga yuboradi

Prezident Shavkat Mirziyoyev mehnat migratsiyasi masalalari boʻyicha yigʻilish oʻtkazdi va dunyoda 168 million kishi tashqi migrant ekanini taʼkidladi. Oʻzbekistonda chet elda ishlashni istagan fuqarolar bor, boshqa davlatlarda esa ishchi kuchiga talab yuqori. Tashkiliy mehnat migratsiyasi boʻyicha hamkor davlatlar soni uchtadan 27 taga yetdi.

Oʻn yil ichida chet elda ishlayotgan oʻzbekistonliklar soni ikki baravarga kamaydi, ammo oilalariga yuborilayotgan pul mablagʻlari toʻrt baravar oshdi. Hududlar oʻrtasidagi tafovut katta: Fargʻona viloyatida chet elda ishlovchiga toʻgʻri keladigan oʻrtacha oylik pul oʻtkazmasi 1 850 dollarni tashkil etadi, Qoraqalpogʻiston va Toshkent viloyatida esa 400 dollar. Germaniya bu yil 45 ming mutaxassis buyurtma bergan, ammo atigi 2 ming kishi ish bilan taʼminlangan; asosiy sabab nemis tilini biladigan kadrlar yetishmasligi.

Kelgusi yili 10 ming kishiga nemis tili va kasb oʻrgatish rejalashtirilgan, har bir viloyatda 8 milliard soʻmdan ajratilib migratsiya markazi tashkil etiladi. Xususiy bandlik agentliklari soni ikki yilda uch baravarga oshgan, ammo prezident xatolar, korrupsiya va aldash holatlari mavjudligini taʼkidlab, bu borada alohida qonun qabul qilinganini aytdi.