Shavkat Mirziyoyev mehnat migratsiyasi masalalari boʻyicha yigʻilish oʻtkazdi

Prezident Shavkat Mirziyoyev mehnat migratsiyasi masalalariga bagʻishlangan yigʻilish oʻtkazmoqda. Unda dunyoda hozirda 168 million kishi xorijiy migratsiyada ekani qayd etildi. Oʻzbekistonlik chet elda ishlashni istagan fuqarolar bilan ishchi kuchiga ehtiyoj yuqori boʻlgan davlatlarni bogʻlash soha mutasaddilari va hudud rahbarlari oldidagi asosiy vazifa ekani aytildi.

“Inson oʻz kasbini puxta egallasin, oʻz qadrini bilsin, oʻz yurtiga tayana olsin”, — dedi Prezident. Soʻnggi yillarda tartibli mehnat migratsiyasiga munosabat tubdan oʻzgardi. Ilgari bu yoʻnalishda 3 ta davlat bilan ish olib borilgan boʻlsa, hozir ularning soni 27 taga yetdi. Hamkorlik qilayotgan yirik xorijiy ish beruvchilar soni qariyb 400 taga koʻpaydi.

Chet elda ishlayotgan yurtdoshlarimiz soni oʻn yilda ikki barobar kamaygan boʻlsa-da, ularning oilalariga yuborayotgan mablagʻlari toʻrt karra oshdi. Prezidentning taʼkidlashicha, bu xalqaro mehnat bozorida oʻzbek mutaxassislariga munosabat oʻzgarib, odamlar chetga oddiy ishchi emas, malakali kadr sifatida borayotganini koʻrsatadi.