Qozogʻistonda mobil pul oʻtkazmalarini soliq tekshiruvi chegarasi oshirildi

Qozogʻistonda jismoniy shaxslarning mobil pul oʻtkazmalarini soliq tekshiruvi uchun chegara summasi oshirildi. Xabarga koʻra, soliq organlarining eʼtiborini endi uch oy ichida jami 1 560 000 tenge dan ortiq tushumlar jalb qilishi mumkin. Oʻzgarishlarni oʻz ichiga olgan buyruqni moliya vaziri Madi Takiyev imzoladi.

Tekshiruv uchun faqat summaning oshib ketishi yetarli emas; bir nechta shartning bir vaqtda bajarilishi talab etiladi. Uch oy davomida 100 yoki undan ortiq turli joʻnatuvchilardan pul tushishi va shu davrdagi umumiy oʻtkazmalar summasi belgilangan chegaradan oshishi kerak. Banklar bunday operatsiyalar haqidagi maʼlumotlarni Smart Data Finance raqamli tizimi orqali Davlat daromadlari qoʻmitasiga uzatadi. Maqsad shaxsiy hisoblardan tadbirkorlik uchun foydalanayotgan, biznesni roʻyxatdan oʻtkazmay soliqdan boʻyin tovlayotganlarni aniqlash.

Moliya vazirligi, shuningdek, qarindoshlar va doʻstlar oʻrtasidagi oddiy oʻtkazmalarning oʻzi soliq tekshiruvi uchun asos emasligini eslatdi.