Qozogʻiston: 2027-yildan sugʻurtalanmagan fuqarolar uchun ayrim tekshiruvlar bepul boʻladi

Qozogʻistonda 2027-yil 1-yanvardan majburiy tibbiy sugʻurta (MTS) tizimida sugʻurtalanmagan fuqarolar poliklinikalarda bir qator asosiy tibbiy tekshiruvlardan bepul oʻtishlari mumkin boʻladi. Tekshiruv vaqtida ijtimoiy ahamiyatga ega kasallik aniqlansa, uni tashxislash va davolash xarajatlarini davlat qoplaydi. Bu haqida Sogʻliqni saqlash vaziri Akmaral Alnazarova hukumat brifingida maʼlum qildi; xabar TengriHealth maʼlumotiga tayanadi.

Vazirning soʻzlariga koʻra, sugʻurta holatidan qatʼi nazar, birlamchi tibbiy-sanitariya yordami doirasidagi ayrim tekshiruvlar hammaga ochiq boʻladi. Ularga umumiy qon va siydik tahlili, qon bosimini oʻlchash, EKG, flyuorografiya, pulsoksimetriya hamda qorin boʻshligʻi va buyraklarning ultratovush tekshiruvi kiradi. Onkologik xarajatlarni davlat toʻliq qoplaydi. Biroq vazir har qanday tekshiruv va davolash bepul boʻlmasligini taʼkidladi.

Alnazarovaning aytishicha, yangi tekshiruvlar fuqarolarning daromadini baholovchi kalkulyator bilan bogʻlanmaydi. U 2026-yil 1-yanvardan beri D va E toifadagi shaxslar uchun hokimliklar MTS badallarini toʻlayotgani va natijada 750 mingdan ortiq kishi sugʻurtalangan fuqaro maqomiga ega boʻlganini eslatdi.