Сақтандырылмаған азаматтарға 2027 жылдан тегін тексерістер қолжетімді болады

2027 жылғы 1 қаңтардан бастап МӘМС жүйесінде сақтандырылмаған азаматтар емханаларда негізгі медициналық тексерістерден тегін өте алады. Тексеріс кезінде әлеуметтік мәні бар ауру анықталса, оны диагностикалау мен емдеудің шығынын мемлекет өтейді. Бұл туралы Үкіметтегі брифингте денсаулық сақтау министрі Ақмарал Әлназарова мәлімдеді, деп хабарлайды TengriHealth.

Алғашқы медициналық-санитариялық көмек аясындағы кейбір тексерістер сақтандыру мәртебесіне қарамастан барлығына қолжетімді болады. Оларға қан мен зәрдің жалпы талдауы, қан қысымын өлшеу, ЭКГ, флюорография, пульсоксиметрия және іш қуысы мен бүйректі ультрадыбыстық зерттеу кіреді. Онкологиялық көмектің шығынын мемлекет толық өтейді. Алайда министр барлық тексеріс пен емдеудің тегін емес екенін атап өтті.

Әлназарованың айтуынша, жаңа тексерістер азаматтардың әл-ауқатын бағалау калькуляторымен байланыстырылмайды. 2026 жылғы 1 қаңтардан бастап әкімдіктер D және E санатындағы адамдар үшін МӘМС жарналарын төлейді, нәтижесінде 750 мыңнан аса адам сақтандырылған азамат мәртебесіне ие болды.