Qozogʻistonda 2027-yildan 77 mingdan ortiq tibbiyot xodimining maoshi oshiriladi

Qozogʻistonda 2027-yil 1-yanvardan boshlab poliklinikalardagi 77 mingdan ortiq uchastka xizmati xodimining maoshini oshirish rejalashtirilgan. Sogʻliqni saqlash vaziri Akmaral Alnazarova hukumatdagi brifingda batafsil maʼlumot berdi.

Vazirlikning hisob-kitobiga koʻra, bu qoʻshimcha toʻlov uchun yiliga taxminan 137 milliard tenge kerak boʻladi. Alnazarova qoʻshimcha toʻlov miqdori uzluksiz ish staji va psixoemotsional yukka bogʻliq boʻlishini aytdi. Vazir uchastka mutaxassislarining maoshi 40 foizgacha oshishi mumkinligini bildirdi.

Vazirlik prognozi boʻyicha, katta ish staji boʻlgan umumiy amaliyot shifokorining maoshi qishloq joylarda 760 ming tengega, shaharda esa 607 ming tengega yetishi mumkin. Oilaviy shifokorlar esa bir kunda 40–50 kishigacha qabul qilishlarini va asosiy maosh koʻpincha yetarli boʻlmayotganini aytmoqda.