Oʻzbekistonda Vyetnamning ROX Group kompaniyasi 115 ming kishilik yangi loyihalar rejalashtirmoqda

Prezident Shavkat Mirziyoyev Buxoro viloyatiga tashrifi chogʻida Vyetnamning ROX Group kompaniyasi Oʻzbekistonda amalga oshirishni rejalashtirgan loyihalar taqdimoti bilan tanishdi. Bu haqda prezident matbuot xizmati xabar berdi.

Kompaniya vakillari Buxoroda ikkita, Toshkent shahrining Uchtepa tumani va Samarqandda bittadan – jami toʻrtta shaharsozlik loyihasi haqida maʼlumot berdi. Ularning umumiy maydoni 285 gektar, investitsiya hajmi 4,5 mlrd dollar, moʻljallangan aholi soni esa 115 ming nafar. Buxoro tumanida 65 gektar, Buxoro shahrida 25 gektar maydonda yangi turar joy massivlari qurilishi boshlandi. Ularda 30 ming nafar aholiga moʻljallangan koʻp qavatli uy-joylar, mehmonxonalar va biznes markazlari barpo etiladi.

Uchtepa loyihasi zamonaviy shahar muhitini yaratishga, Samarqanddagi tashabbus esa mavjud sayyohlik majmuasi atrofidagi infratuzilmani kengaytirishga qaratilgan. Vetnamlik investor Jizzax viloyatining Zomin tumanida sanoat zonasi tashkil etish tashabbusini ham ilgari surdi. Prezident konsepsiyalarni maʼqulladi va masʼullarga kompaniya bilan birgalikda infratuzilma hamda amalga oshirish mexanizmlarini ishlab chiqish boʻyicha koʻrsatma berdi.