Özbəkistanda Vyetnamın ROX Group şirkətinin 115 min nəfərlik yeni layihələri planlaşdırılır

Özbəkistan Prezidenti Şavkat Mirziyoyev Buxara vilayətinə səfəri zamanı Vyetnamın ROX Group şirkətinin Özbəkistanda həyata keçirilməsi planlaşdırılan layihələrinin təqdimatı ilə tanış olub. Bu barədə prezident mətbuat xidməti məlumat verib.

Layihələr Buxarada iki, Daşkəndin Uçtepa rayonunda və Səmərqənddə isə birər olmaqla dörd şəhərsalma layihəsini əhatə edir. Ümumi sahə 285 hektar, investisiya həcmi 4,5 milyard dollar, hədəf əhali isə 115 min nəfərdir. Buxara rayonunda 65 hektar, Buxara şəhərində 25 hektar sahədə yeni yaşayış massivlərinin tikintisinə başlanılıb; 30 min nəfər üçün çoxmərtəbəli evlər, otellər və biznes mərkəzləri nəzərdə tutulub.

Uçtepa layihəsi müasir şəhər mühiti yaratmağa, Səmərqənddəki təşəbbüs isə mövcud turizm kompleksi ətrafında infrastrukturun genişləndirilməsinə yönəlib. Vyetnamlı investor həmçinin Cizzax vilayətinin Zomin rayonunda sənaye zonası yaradılmasını təklif edib. Prezident konsepsiyaları təsdiqləyib və məsul şəxslərə şirkətlə birlikdə infrastruktur və həyata keçirmə mexanizmlərini hazırlamaq barədə tapşırıq verib.