Vyetnamning ROX Group kompaniyasi Oʻzbekistonga 4,5 mlrd dollar sarmoya kiritmoqchi

Prezident Shavkat Mirziyoyev Buxoro viloyatiga safari davomida Vyetnamning ROX Group kompaniyasi Oʻzbekistondagi loyihalari taqdimoti bilan tanishgan. Buni davlat rahbari matbuot xizmati xabar qildi. 1996-yilda Vyetnamda asos solingan ROX Group koʻchmas mulk, energetika, bank ishi, mehmonxona va xizmat koʻrsatish sohalarida faoliyat yurituvchi koʻp tarmoqli investitsiya guruhidir.

Kompaniya umumiy maydoni 285 gektar va investitsiya hajmi 4,5 mlrd dollar boʻlgan toʻrtta shaharsozlik loyihasini amalga oshirishni rejalashtirmoqda. Loyihalar 115 ming aholiga moʻljallangan. Ikkitasi Buxoroda, bittasi Toshkentning Uchtepa tumanida, yana bittasi Samarqandda joylashgan. Buxoro tumanida 65 gektar va Buxoro shahrida 25 gektar maydonda yangi turar-joy massivlarining qurilishi boshlangan. Bu yerda 30 ming aholiga moʻljallangan koʻp qavatli uylar, mehmonxonalar, biznes markazlari va savdo hamda xizmat koʻrsatish obyektlari nazarda tutilgan.

Toshkentdagi Uchtepa City loyihasida biznes va koʻngilochar markazlar, turar-joylar hamda yangi infratuzilma yaratilishi koʻzda tutilgan. Gazeta.uz avvalroq xabar bergan ediki, loyihaning qiymati 1,5 mlrd dollar deb baholanmoqda. Samarqanddagi loyiha mavjud turistik majmua atrofidagi infratuzilmani rivojlantirishga qaratilgan. Vyetnamlik investor shuningdek Jizzax viloyatining Zomin tumanida sanoat zonasi yaratishni taklif qilgan. Prezident taqdim etilgan konsepsiyalarni maʼqullab, ilgʻor shaharsozlik yechimlarini qoʻllash zarurligini taʼkidlagan. Masʼul shaxslarga kompaniya bilan birgalikda loyihalarni amalga oshirish mexanizmlarini ishlab chiqish topshirilgan.