Azərbaycan: özəl sektorda gəlir vergisi dərəcəsi 2027-ci ildə 5 faizə yüksələcək

2027-ci ildən etibarən qeyri-neft-qaz və qeyri-dövlət sektorunda muzdlu işdən gəlir vergisi dərəcəsinin 3 faizdən 5 faizə artırılması dövlət büdcəsi hesablamalarında nəzərə alınıb. Modern.az xəbər verir ki, bu barədə Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında müzakirə olunan 2027-ci il dövlət büdcəsi layihəsində qeyd edilib.

Sənədə görə, gələn il fiziki şəxslərin gəlir vergisi üzrə büdcəyə 3 milyard 70 milyon manat daxil olacağı proqnozlaşdırılır. Bu, 2026-cı ilin proqnozundan 690,7 milyon manat və ya 29 faiz çoxdur. Həmin vəsaitin 2 milyard 758,3 milyon manatının əməkhaqqından, 311,7 milyon manatının isə sahibkarlıq və qeyri-sahibkarlıq fəaliyyətindən tutulan gəlir vergisinin payına düşəcəyi gözlənilir.

Artımın səbəbləri sırasında vergi dərəcəsinin yüksəlməsi ilə yanaşı, orta əməkhaqqının artması və büdcə təşkilatlarında aparılan əməkhaqqı islahatları da göstərilib.