Azərbaycanda 2027-ci il büdcəsi: doğum müavinəti 1500 manata artırılır

Azərbaycanın 2027-ci il dövlət büdcəsi layihəsində bir sıra sosial müavinət və ödənişlərin məbləğinin artırılması nəzərdə tutulur. Day.Az Xəzər TV-yə istinadən bildirir ki, layihəyə əsasən, uşağın anadan olmasına görə ödənilən müavinətin məbləğinin kəskin artımı proqnozlaşdırılır. 2026-ci ildə yeni doğulan uşağa görə birdəfəlik 600 manat ödənilirdisə, gələn ildən bu məbləğ 900 manat artırılaraq 1500 manat olacaq.

Maliyyə naziri Sahil Babayev bildirib ki, 2027-ci ilin dövlət büdcəsində sosial müdafiə və sosial təminata ayrılan vəsait əhalinin rifahının yaxşılaşdırılması məqsədi daşıyır. 3 yaşınadək uşağı olan sığortaolunan analara hər ay 100 manat pul veriləcək. Daha əvvəl bu məbləğ 37 manat 58 qəpik idi.

Pensiyaçılar üçün dəfn pulunun orta məbləği 946 manatdan 1200 manata, sığortaolunanlar üçün isə 590 manatdan 700 manata çatdırılması proqnozlaşdırılır. 20 il və daha çox xidməti olan işləyən və ehtiyatda olan hərbi qulluqçuların mənzillə təmin olunması üçün 15 milyon manat ayrılıb. Kirayəyə götürülən yaşayış sahəsinə görə kompensasiya üçün isə 14,7 milyon manat nəzərdə tutulub.