Sahil Babayev: 2027-ci ildə qeyri-neft-qaz ÜDM 2023-cü ilə nisbətən 38 % artacaq

Azərbaycanın maliyyə naziri Sahil Babayev Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında 2027-ci ilin büdcə zərfinin müzakirəsi zamanı bildirib ki, 2027-ci ildə qeyri-neft-qaz sektorunda ÜDM istehsalının dəyəri 2023-cü illə müqayisədə 30 milyard manat çox olacaq. Bu, 5 il ərzində 38 % artım deməkdir.

Hökumət gələn il ölkədə 141 milyard manatlıq ÜDM istehsal olunacağını proqnozlaşdırır. Bunun 109,1 milyard manatlıq hissəsinin qeyri-neft-qaz sektorunun payına düşəcəyi gözlənilir. İqtisadi artımın 2,7 %, qeyri-neft-qaz sektorunda isə 4,4 % təşkil edəcəyi proqnozlaşdırılır. Neft-qaz sektorunda isə 1,8 % azalma gözlənilir.

S.Babayev 2027-ci ildə neftin büdcə qiymətinin 65 ABŞ dolları götürüldüyünü bildirib. Geosiyasi vəziyyəti nəzərə alaraq neftin qiymətinin daha yüksək olacağını düşündüklərini, lakin fiskal çərçivənin qorunması məqsədilə konservativ yanaşma tətbiq etdiklərini əlavə edib.