SOFAZ-ın 2027 büdcəsi profisitlə proqnozlaşdırılır, dövlət transferi azalır

Azərbaycan Dövlət Neft Fondunun (SOFAZ) 2027-ci il büdcəsinin profisitlə işləməsi proqnozlaşdırılır. Gəlirlərin 7,8 milyard dollar (13,26 milyard manat), xərclərin isə 7,1 milyard dollar (12,07 milyard manat) təşkil etməsi gözlənilir. Maliyyə naziri Sahil Babayev bu rəqəmləri 2027-ci il büdcə paketinin müzakirəsi zamanı Milli Məclisin İqtisadi siyasət, sənaye və sahibkarlıq komitəsinin bugünkü iclasında elan edib.

Nazirin sözlərinə görə, fonddan dövlət büdcəsinə strateji transfer gələn il azaldılacaq. 2027-ci ildə fonddan dövlət büdcəsinə 7 milyard dollar transfer gözlənilir ki, bu da cari ilə nisbətən 550 milyon dollar və ya 935 milyon manat azdır. Babayev transferin azaldılması siyasətinin ardıcıl olaraq ikinci ildir həyata keçirildiyini qeyd edib.

Müqayisə üçün, SOFAZ-ın 2026-cı il büdcəsində gəlirlərin 13,03 milyard manat (əvvəlki ilə nisbətən 9,8% az), xərclərin isə 13,02 milyard manat (11% azalma) olacağı proqnozlaşdırılmışdı. 2026-cı il dövlət büdcəsində SOFAZ-dan 12,835 milyard manat transfer nəzərdə tutulmuşdu ki, bu da 2025-ci il üzrə təsdiq edilmiş proqnozla müqayisədə 11,4% azalma deməkdir.