2027-ci ildə Azərbaycanda əmək pensiyaları 7,5 faiz artırılacaq

2027-ci ildə Azərbaycanda əmək pensiyalarının 7,5 faiz artırılması proqnozlaşdırılır. Day.Az xəbər verir ki, bu göstərici Milli Məclisin İqtisadi siyasət, sənaye və sahibkarlıq komitəsində müzakirəyə çıxarılan 2027-ci il dövlət büdcəsi haqqında qanun layihəsində əks olunub.

Sənədə əsasən, 2027-ci ildə əmək pensiyalarının ödənilməsi üçün 8 milyard 669,43 milyon manat xərc nəzərdə tutulub. Bu, 2026-cı ilin təsdiq edilmiş proqnoz göstəricisi ilə müqayisədə 676,55 milyon manat və ya 8,46 faiz çoxdur. Pensiyaların indeksləşdirilməsində 2027-ci ildə orta aylıq nominal əməkhaqqının 7,5 faiz artacağı gözləntisi nəzərə alınıb.

Layihəyə görə, 2026-cı ilin sonunda orta aylıq əmək pensiyasının 594,4 manat olacağı gözlənilir və 2027-ci ildə bu məbləğin təxminən 7,5 faiz artaraq 639 manata çatacağı proqnozlaşdırılır.