Azərbaycanda 2027-ci il büdcəsində bir sıra sosial ödənişlərin artırılması gözlənilir

Azərbaycanda 2027-ci il üçün dövlət büdcəsi layihəsinə əsasən bir sıra sosial ödənişlərin artırılması gözlənilir. Day.az Trend-ə istinadən xəbər verir ki, Milli Məclisin iqtisadi siyasət, sənaye və sahibkarlıq komitəsinə təqdim olunan 2027-ci il dövlət büdcəsi haqqında qanun layihəsində məcburi dövlət sosial sığortası haqqı hesabına ödənişlər üçün 280 milyon 630 min manat nəzərdə tutulur. Bu məbləğ təsdiq edilmiş 2026-cı il proqnozundan 77 milyon 60 min manat, yəni 37,85 faiz çoxdur.

Layihəyə görə, 2027-ci ildə 3 yaşadək uşağa qulluq müavinəti alacaq şəxslərin sayının 24 870 nəfər olacağı proqnozlaşdırılır. Bu məqsəd üçün 21 milyon 388 min 148 manat ayrılıb və hər nəfər üzrə aylıq müavinət 100 manat olacaq. Hamiləlik və doğuma görə müavinət üçün 77 milyon 340 min 781 manat planlaşdırılır və bu ödənişi 19 599 nəfərin alacağı gözlənilir.

Doğuma görə birdəfəlik müavinət 600 manatdan 1 500 manata qaldırılacaq ki, bu da 900 manat artım və 2,5 dəfə deməkdir. Dəfn müavinətləri də artırılacaq: sığortalı şəxs üzrə 590 manatdan 700 manata, pensiyaçı üzrə 946 manatdan 1 200 manata.