Qəribabadi: Hörmüz boğazındakı mövcud çətinliklərin səbəbi İrana qarşı hərbi təcavüz və dəniz blokadasıdır

İran İslam Respublikasının xarici işlər nazirinin müavini Kazım Qəribabadi, İranın qonşuları ilə münasibətləri yaxşılaşdırmağa çalışdığını və heç bir ölkənin ərazisinin İrana qarşı silahlı hücumlar üçün istifadəsinə icazə verməməli olduğunu bildirib.

APA xəbər verir ki, Qəribabadi bunu Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) zirvə toplantısındakı çıxışında deyib. O, Hörmüz boğazının onilliklər ərzində açıq olduğunu və problemsiz fəaliyyət göstərdiyini qeyd edib.

Qəribabadinin sözlərinə görə, hazırkı çətinliklərin əsas səbəbi İrana qarşı hərbi təcavüz və ölkəyə tətbiq edilən dəniz blokadasıdır. O vurğulayıb ki, gəmiçiliyin təhlükəsizliyi sahilyanı dövlətlərin təhlükəsizliyi ilə bağlıdır. Regionda sülhün və sabitliyin bərqərar olması, Hörmüz boğazından təhlükəsiz keçidin təmin edilməsi üçün təcavüzə son qoyulmalı, İrana qarşı dəniz blokadası və sanksiyalar tamamilə ləğv edilməli, ölkənin suverenliyinə və ərazi bütövlüyünə hörmət göstərilməlidir.