Azərbaycanda yaşayış minimumu 2030-cu ilədək 359 manata çatdırılacaq

Azərbaycanda yaşayış minimumunun 2030-cu ilədək 359 manata çatdırılması proqnozlaşdırılır. İqtisadiyyat nazirinin müavini Sahib Ələkbərov Milli Məclisin Əmək və sosial siyasət komitəsi ilə İqtisadi siyasət, sənaye və sahibkarlıq komitəsinin birgə iclasında «Dövlət sosial müdafiə fondunun 2027-ci il büdcəsi haqqında» qanun layihəsi müzakirə olunarkən bunu deyib.

Proqnoza görə, 2027-2030-cu illər üzrə ölkə üzrə yaşayış minimumu müvafiq olaraq 314 manat, 329 manat, 344 manat və 359 manat olacaq. 2027-ci il üçün əmək qabiliyyətli əhali üçün 334 manat, pensiyaçılar üçün 258 manat, uşaqlar üçün 274 manat nəzərdə tutulur. 2026-cı ildə ölkə üzrə yaşayış minimumu 300 manat müəyyən edilib.

Əlkbərov bildirib ki, cari ilin 9 ayında əsas kapitala investisiyalar real ifadədə 10,9 faiz, qeyri-neft-qaz sektorunda özəl investisiyalar isə təxminən 21 faiz artıb. Əsas prioritetlər arasında qeyri-neft-qaz ixracının genişləndirilməsi, strateji investisiya layihələrinin sürətləndirilmiş icrası və nəqliyyat dəhlizləri boyunca iqtisadi fəallığın təşviqi var.