Tatarıstan başçısı Rüstəm Minnıxanov iş səfəri ilə Cakartaya gəlib

Tatarıstan Respublikasının başçısı Rüstəm Minnıxanov iş səfəri ilə İndoneziyanın paytaxtı Cakartaya gəlib. Bu barədə Tatarıstan başçısının mətbuat xidmətinin rəhbəri Liliya Qalimova məlumat verib.

Bildirilib ki, respublika başçısının sabah bir neçə görüşü keçiriləcək. Onlardan bəziləri Rusiya Prezidenti Vladimir Putinin tapşırığı ilə Minnıxanovun rəhbərlik etdiyi "Rusiya – İslam dünyası" strateji baxış qrupunun fəaliyyəti ilə bağlı olacaq.

İndoneziya Hind və Sakit okeanlar arasında yerləşən Cənub-Şərqi Asiya ölkəsidir. 17 mindən çox adadan ibarətdir və dünyanın ən böyük ada dövlətidir. Ölkədə 280 milyondan çox insan yaşayır. Əhalinin 87 faizindən çoxunu müsəlmanlar təşkil edir. İqtisadiyyatı Cənub-Şərqi Asiyanın ən böyüklərindən biridir və təbii resurslar, sənaye, kənd təsərrüfatı, ticarət və turizmi əhatə edir.