Orxan Nəzərli: vergi borclarına görə faizlərin iki dəfə azaldılması təklif olunur

Dövlət Vergi Xidmətinin rəisi Orxan Nəzərli vergi öhdəliklərinin vaxtında ödənilməməsinə görə hesablanan faizlərin iki dəfə azaldılmasını təklif edib. O, bunu bu gün Milli Məclisin İqtisadi siyasət, sənaye və sahibkarlıq komitəsinin iclasında açıqlayıb. Təklifə görə, müəyyən olunmuş vaxtda icra edilməyən vergi öhdəliyinə görə hər gecikdirilmiş gün üçün tətbiq olunan faizlər iki dəfə azaldılacaq. Xidmət İqtisadiyyat Nazirliyi yanında fəaliyyət göstərir.

Nəzərli dəyişikliklərin prioritet istiqamətlərindən birinin ixracın həvəsləndirilməsi olduğunu bildirib. İxrac fəaliyyəti ilə məşğul olan vergi ödəyicilərinə əlavə vergi güzəştlərinin tətbiqi təklif olunur. İrəli sürülən təşviqlər təkcə malların deyil, həm də xidmətlərin ixracını əhatə edir. Bu dəyişikliklərin yerli sahibkarlıq subyektlərinin beynəlxalq bazarlara çıxış imkanlarını genişləndirməsi və ölkənin ixrac potensialını gücləndirməsi nəzərdə tutulub.

O, həmçinin maliyyə sanksiyalarının daha qısa müddət ərzində ödənilməsini təşviq etmək məqsədilə əlavə həvəsləndirici mexanizmlərin tətbiqinin nəzərdə tutulduğunu vurğulayıb.