Azərbaycanda vergi borclarına möhlət mexanizmi sadələşdirilir və avtomatlaşdırılır

Vergi borclarına möhlət mexanizminin avtomatlaşdırılması və sadələşdirilməsi sahibkarlar üçün növbəti mühüm güzəşt kimi təqdim olunur. AZƏRTAC xəbər verir ki, bunu Dövlət Vergi Xidmətinin rəisi Orxan Nəzərli Milli Məclisin İqtisadi siyasət, sənaye və sahibkarlıq komitəsinin iclasında deyib.

Onun sözlərinə görə, vergi borclarına möhlət verilməsi hüququnun avtomatlaşdırılması və tətbiq şərtlərinin sadələşdirilməsi nəzərdə tutulur. Bu, əlavə sənədlərin təqdim edilməsinə dair tələbin aradan qaldırılması deməkdir. Təklif olunan dəyişikliklərin mütləq əksəriyyəti sahibkarlığın dəstəklənməsinə, biznes mühitinin yaxşılaşdırılmasına və iqtisadi fəallığın stimullaşdırılmasına yönəlib.

Dəyişikliklərin bir hissəsi sahibkarlıq subyektləri və biznes assosiasiyaları ilə aparılan müzakirələr və onların irəli sürdüyü təkliflər əsasında formalaşıb. Nəzərli bunu vergi qanunvericiliyinin təkmilləşdirilməsində dövlət–biznes dialoquna verilən önəmin göstəricisi kimi qiymətləndirib.