Azərbaycan: taksi sürücüləri üçün 2027-ci ildən gəlirə əsaslanan yeni vergi modeli

Bakı, 6 noyabr (AZƏRTAC) – 2027-ci ildən taksi sürücülərinə aid gəlirə mütənasib yeni vergitutma modelinin həyata keçirilməsi nəzərdə tutulur. AZƏRTAC xəbər verir ki, bunu Dövlət Vergi Xidmətinin baş idarə rəisi Nicat İmanov Milli Məclisin İqtisadi siyasət, sənaye və sahibkarlıq komitəsinin iclasında deyib.

Hazırda vergi ödənişi fərqlənmə nişanının əldə edilməsi formasında aparılır və sürücünün gəlirinin həcmindən asılı olmayaraq, sabit qaydada 18 manat məbləğində vergi tutulur. Yeni təklif isə daha ədalətli, gəlirə əsaslanan vergitutma modelini nəzərdə tutur. Operatorlar vasitəsilə verginin ödəniş mənbəyində tutulması ilə taksi fəaliyyəti ilə məşğul olanların üzərindəki inzibati yük aradan qaldırılacaq.

Gəlirdən dövlət büdcəsinə ödənilməli vergi 1 faiz dərəcəsi əsasında hesablanacaq. Aşağı dövriyyəyə malik sürücü daha az, yüksək dövriyyəsi olan sürücü isə 1 faiz çərçivəsində daha çox vergi ödəyəcək. Hesablamalara görə, orta vergi məbləği təxminən 18 manat səviyyəsində qalacaq, bəzi hallarda isə vergi dərəcələri bu rəqəmdən aşağı olacaq.