Xorvatiya Zaqrebdə Özbəkistan Miqrasiya Agentliyinin nümayəndəliyini dəstəkləyir

Xorvatiya Özbəkistanın Zaqrebdə Miqrasiya Agentliyinin nümayəndəliyinin açılması təşəbbüsünü dəstəkləyib. UzDaily-nin məlumatına görə, bu barədə Agentliyin direktoru Muxsinxocə Abdurahmonovun Xorvatiyanın Xarici və Avropa İşləri Nazirliyinin rəhbərliyi ilə apardığı danışıqlardan sonra məlum olub.

Planlaşdırılan nümayəndəlik Xorvatiyada yaşayan Özbəkistan vətəndaşlarına hüquqi və praktiki yardım göstərəcək. Həmçinin, o, Sloveniya və Serbiya ilə miqrasiya sahəsində əməkdaşlığın inkişafı üçün koordinasiya mərkəzinə çevrilə bilər.

Görüşdə, dövlətlərarası proqramlar çərçivəsində Xorvatiyada işə düzələn Özbəkistan vətəndaşları üçün viza sənədlərinin rəsmiləşdirilməsinin sürətləndirilməsi imkanları da müzakirə olunub. Xorvat tərəfi konsulluqlarla birlikdə bu prosedurları asanlaşdıran praktiki həllər axtarmağa hazır olduğunu bildirib. Tərəflər qarşılıqlı əlaqəni davam etdirməyi və razılaşmaların həyata keçirilməsinə keçməyi qərara alıblar.