Türkmənistan Prezidenti Gənc Etimad Səfirləri Şəbəkəsinin yaradılmasını təklif etdi

Oktyabrın 15-də Türkmənistan Prezidenti Serdar Berdimuhamedov Bakıda keçirilən Asiyada Qarşılıqlı Əlaqə və Etimad Tədbirləri Şurasının (CICA) VII Sammitində çıxış edərək Gənc Etimad Səfirləri Şəbəkəsinin yaradılmasını təklif etdi.

Dövlət başçısı insani əməkdaşlığın əhəmiyyətini vurğulayaraq, CICA ölkələri xalqlarının zəngin mədəni ənənələrinin və tarixi bağlarının qarşılıqlı anlaşmanı gücləndirmək üçün etibarlı əsas olduğunu bildirdi. Türkmənistanın akademik mübadilələrin genişləndirilməsini və gənclik platformaları çərçivəsində tərəfdaşlığın inkişafını dəstəklədiyi qeyd edildi. Prezident Berdimuhamedov gənclər diplomatiyasının gücləndirilməsinin yeni nəslin sülhsevər dialoq mədəniyyətinin möhkəmləndirilməsinə cəlb edilməsi üçün güclü stimul olacağını vurğuladı.

Praktik addım kimi Berdimuhamedov, ölkələrin fəal, istedadlı və tərəqqipərvər gənclərindən ibarət, sülh, dözümlülük və konstruktiv mədəniyyətlərarası dialoq ideallarını təbliğ etməli olan şəbəkənin yaradılmasını təklif etdi.