AİB Azərbaycanda dəmir yolu və Bakı metrosu üçün 652 milyon dollardan çox kredit ayırıb

Asiya İnkişaf Bankı (AİB) Azərbaycanda dəmir yolu və metro infrastrukturunun modernləşdirilməsi üçün 652 milyon dollardan çox kredit ayırıb. Layihələr "AZCON Holding" şirkətlərindən olan "Azərbaycan Dəmir Yolları" QSC (ADY) və "Bakı Metropoliteni" QSC-ni əhatə edir və regional bağlantıların gücləndirilməsinə, şəhərdaxili mobilliyin inkişafına yönəlib.

Kreditin 350 milyon ABŞ dolları Biləcəri–Yalama arasındakı 192 kilometrlik ikixətli dəmir yolunda elektrikləşdirmə, siqnallaşdırma və telekommunikasiya sistemlərinin quraşdırılmasına yönəlib. Bu xətt Şimal-Cənub və Şimal-Qərb Beynəlxalq Nəqliyyat dəhlizlərinin əsas bağlantılarından biridir. İşlər tamamlandıqdan sonra xətt sabit cərəyandan dəyişən cərəyana keçəcək, enerji istehlakı, texniki xidmət xərcləri və istixana qazı emissiyaları azalacaq, qatarların sürəti isə artacaq.

302,38 milyon ABŞ dolları isə Bakı Metropoliteninin siqnalizasiya sisteminin modernləşdirilməsi və əməliyyatların rəqəmsallaşdırılması üçün ayrılıb. Layihə metro xidmətlərinin daha təhlükəsiz, etibarlı və səmərəli olmasına xidmət edir və hökumətin Bakı Metropoliteninin genişləndirilməsi proqramının bir hissəsidir.