İran XİN başçısı: Erməni dostlarımıza güvənirik

İran Xarici İşlər naziri Abbas Araqçi oktyabrın 16-da İrəvanda jurnalistlərə açıqlamasında İranın ABŞ-ın regionda və öz ətrafında istənilən formada mövcudluğundan narahat olduğunu bildirib. Onun sözlərinə görə, Tehran Ermənistanın İranın təhlükəsizliyinə qarşı addım atmayacağına inanır.

Modern.az-ın verdiyi məlumata görə, Araqçi bunu TRIPP layihəsi və ABŞ-ın regiondakı mövcudluğu ilə bağlı sualı cavablandırarkən deyib. İranın bu məsələdəki narahatlığının davam edib-etmədiyi barədə suala cavabında isə nazir Ermənistanla birbaşa təmasların olduğunu vurğulayıb.

«Biz bu məsələ ilə bağlı erməni dostlarımızla birbaşa əlaqədəyik. Onlara güvənirik və bilirik ki, onlar İranın təhlükəsizliyinə qarşı heç nə etmirlər», – deyə Araqçi qeyd edib. O, Ermənistan Xarici İşlər naziri Ararat Mirzoyanın Tehrana səfərini və orada keçirilən müzakirələri xatırladaraq, məsləhətləşmələrin davam etdiyini bildirib. Araqçi bu gün prezidentin Ermənistan baş naziri ilə görüşəcəyini və İran ilə Ermənistan arasında sıx təmasların davam etdiyini əlavə edib.