DARYA Yüksək Səviyyəli Qrupunun 5-ci iclası Aşqabadda başlayıb

13 oktyabr 2026-cı ildə Aşqabadda DARYA Regional Proqramının Yüksək Səviyyəli Qrupunun 5-ci iclası başlayıb. İclasda Xəzərarxası Nəqliyyat Dəhlizi çərçivəsində bacarıqların inkişafı müzakirə olunur. Məlumatı Türkmənistanın Xarici İşlər Nazirliyi verib.

İclasın birinci günündə iştirakçılar nəqliyyat və logistika sektoru üçün ixtisaslı kadrların hazırlanması, peşə təhsilinin inkişafı və Mərkəzi Asiyada regional əməkdaşlığın gücləndirilməsini müzakirə ediblər. Türkmənistanın Xarici İşlər naziri müavini M. Bəşimova nəqliyyat əlaqələrinin inkişafının beynəlxalq əməkdaşlığın genişlənməsi üçün əhəmiyyətini vurğulayıb.

O bildirib ki, nəqliyyat dəhlizlərinin səmərəli fəaliyyəti müasir infrastrukturla yanaşı, ixtisaslı mütəxəssislər tələb edir. Vurğulanıb ki, insan kapitalının inkişafı və əmək bazarının tələblərinə uyğun peşə hazırlığı Xəzərarxası Nəqliyyat Dəhlizinin rəqabət qabiliyyətini artırmaq üçün vacibdir. İclasda Mərkəzi Asiya ölkələri ilə Avropa İttifaqı arasında təcrübə mübadiləsinə xüsusi diqqət yetirilib. İclas davam edir.