AKSA Enerji Kalecik Elektrik Stansiyasının gücünü 223 meqavata çatdıracaq

AKSA Enerji Şimali Kipr Türk Respublikasında fəaliyyət göstərən Kalecik Elektrik Stansiyasının quraşdırılmış gücünü 35 meqavatlıq əlavə investisiya ilə 223 meqavata çatdıracağını elan edib. Anadolu Agentliyinin xəbərinə görə, şirkətin açıqlamasında stansiyanın KKTC-nin elektrik ehtiyacının təxminən yarısını ödədiyi və tutumun artırılacağı bildirilib.

Xəbərə görə, investisiya Kipr Türk Elektrik Qurumu (KIB-TEK) ilə imzalanmış müqavilə çərçivəsində qüvvəyə minmiş əlavə protokol əsasında həyata keçiriləcək və stansiyanın hazırkı 188 meqavatlıq quraşdırılmış gücü 223 meqavata yüksəldiləcək. Şirkət ilə KIB-TEK arasında 2023-cü ildə imzalanmış razılaşmaya əsasən, Kalecik Elektrik Stansiyasının istismar müddəti 2038-ci ilə qədər uzadılmışdı.

AKSA Enerjinin Baş İcraçı Direktoru (CEO) və İcra Heyətinin Sədri Naci Ağbal ada iqtisadiyyatlarında güclü və etibarlı enerji infrastrukturunun iqtisadi və sosial inkişaf üçün vacib olduğunu bildirib. Ağbal şirkətin KKTC-də 20 ildən çox müddətdir uzunmüddətli investisiyalar həyata keçirdiyini qeyd edib.