Füzulinin iki kəndinə bu ilin sonuna kimi əhalinin qayıdışı təmin olunacaq

Füzuli rayonunun Dövlətyarlı və Pirəhmədli kəndlərinə bu ilin sonuna kimi əhalinin qayıdışı təmin olunacaq. Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin İctimaiyyətlə əlaqələr şöbəsinin müdiri Təranə Quluyeva bu barədə Trend-in Qarabağ bürosuna açıqlamasında deyib. O bildirib ki, hər iki kənddə bərpa və quruculuq işləri davam etdirilir və işlər yekunlaşmaq üzrədir.

Quluyeva oktyabrın 17-nin həm Azərbaycan dövləti, həm də füzulililər üçün əlamətdar gün olduğunu qeyd edib. Bir neçə ildir ki, bu gün Füzuli şəhərinin işğaldan azad olunması münasibətilə silsilə tədbirlər keçirilir.

Azərbaycan Prezidentinin Ağdam, Füzuli və Xocavənd rayonlarında xüsusi nümayəndəsi Emin Hüseynov II Azərbaycan Beynəlxalq İnvestisiya Forumu çərçivəsində Trend-ə açıqlamasında üç rayonda əhalinin sayının ilin sonunadək 25 min nəfərə çatdırılmasının gözlənildiyini bildirib. O, 2023-cü ildən etibarən Füzuli şəhərinə 3 min nəfər köçürüldüyünü və ilin sonuna qədər rayonda əhalinin daha 1 500-1 600 nəfər artacağının proqnozlaşdırıldığını əlavə edib.