Qazaxıstanda təxminən 522 min nəfər dövlət müavinətlərini itirə bilər

Qazaxıstanda 2027-ci il yanvarın 1-dən tətbiq olunacaq ehtiyac meyarları səbəbindən təxminən 522 min nəfərin dövlət müavinətlərini itirə biləcəyi bildirilib. Bu barədə vitse-baş nazir – Milli İqtisadiyyat naziri Serik Jumangarin məlumat verib.

Nazirin sözlərinə görə, Qazaxıstanda yüksək (“A”) rifah səviyyəsinə malik təxminən 77 min nəfər var, qalan 445 min nəfər isə “B” kateqoriyası üzrə varlı qrupa aiddir. Əmək Nazirliyi bu kateqoriyalar üzrə dəqiq hesablamanı hələ davam etdirir. Nazir sistemdə təxminən 30 komponentin istifadə olunacağını və monitorinqin hər gün aparılacağını bildirib.

Hökumətin təsdiqlədiyi yeni meyarlara görə, varlı ailələr artıq dövlət dəstəyi ala bilməyəcək. 2027-ci il yanvarın 1-dən 10 müavinətin ödənilmə qaydası dəyişəcək; siyahıya doğuşa görə birdəfəlik ödəniş, uşağa qulluq üzrə aylıq müavinət və çoxuşaqlı ailələrə ödənişlər daxildir. Yeni normalar təsdiqləndikdən sonra Əmək Nazirliyinin nümayəndələri ölkənin 20 regionunu gəzib islahat barədə izahat verəcək. Baş nazir Olcas Bektenov islahatın üç ildə büdcəyə 2,5 trilyon tenge qənaət gətirəcəyini açıqlayıb.