ABŞ Dövlət katibi Rubio Qazaxıstana tam həcmli səfər edəcək

ABŞ Dövlət katibi Marko Rubio G20 Zirvəsindən sonra Qazaxıstana səfər etmək niyyətində olduğunu bildirib. Bu barədə o, Səmərqənddə Qazaxıstanın xarici işlər naziri Muxtar Tleuberdi ilə görüşdə danışıb.

İki ölkənin xarici siyasət idarələrinin rəhbərləri genişləndirilmiş strateji tərəfdaşlığın inkişaf perspektivlərini, ticarət-iqtisadi və investisiya əməkdaşlığının möhkəmləndirilməsini müzakirə ediblər. Tərəflər ikitərəfli münasibətlərdə müsbət dinamikanı qeyd edib, ticarət dövriyyəsinin artırılması və birgə investisiya layihələrinin həyata keçirilməsinə maraqlarını təsdiqləyiblər.

Görüşdə ən yüksək səviyyədə əldə olunan razılaşmaların, o cümlədən Qazaxıstan Prezidenti Qasım-Jomart Tokayevin 2025-ci ilin noyabrında ABŞ Prezidenti Donald Tramp ilə görüşü yekunları üzrə razılaşmaların icrasına xüsusi diqqət yetirilib. Muxtar Tleuberdi investisiya və texnologiyaların cəlb edilməsinin, enerji, kritik mineral, rəqəmsallaşma, nəqliyyat və logistika sahələrində əməkdaşlığın önəmini vurğulayıb. Rubio G20 Zirvəsindən sonra qısa müddətdə tam həcmli səfər etmək marağını təsdiqləyib.