Sülh müqaviləsi harada imzalanacaq: Moskva, Vaşinqton, yoxsa sərhəd?

Ermənistanın Baş naziri Nikol Paşinyan yaxın vaxtlarda Azərbaycanla sülh müqaviləsinin imzalanmasına və sənədin ratifikasiyasına diqqət yetirilməli olduğunu bildirib. O, müqavilənin imzalanmasını Ermənistan dövlətçiliyinin uzunömürlülüyünün təmin edilməsi baxımından vacib sayıb. Paşinyan bu barədə sosial şəbəkələrdə paylaşdığı videomüraciətində danışıb.

“Bu baş verdikdən sonra Ermənistan dövlətçiliyinin uzunömürlülüyünün təməlini qoyduğumuzu deyə biləcəyik”, – deyə baş nazir vurğulayıb. O, bu fikrini “İlk dəfədir ki, tarixi təkrarlamır, onu yaradırıq” bəyanatı ilə əlaqələndirib.

Modern.az-a açıqlamasında sabiq səfir Nəsib Nəsibli sülh müqaviləsinin mümkün qədər tez imzalanmasının hər iki ölkənin maraqlarına uyğun olduğunu bildirib. Onun fikrincə, bu addım Cənubi Qafqazda Rusiyanın təsirinin azalmasına və regionda sabitliyə töhfə verə bilər. Nəsibli Moskva, Vaşinqton, Strasburq və Brüsselin bu prosesdə rol oynamaqda maraqlı ola biləcəyini, lakin ən məqsədəuyğun variantın iki ölkə arasında sərhəd bölgələrindən birində imzalanması olduğunu qeyd edib.