Mirziyoyev Tacikistan sərhədində ID kartla keçidin sürətləndirilməsini istədi

Özbəkistan Prezidenti Şövkət Mirziyoyev Tacikistanla sərhəddə ID kartlarla keçid sisteminin daha sürətlə tətbiq edilməsinə çağırıb. Onun sözlərinə görə, iki ölkə arasında yük daşımalarının həcminin artması bu məsələnin həllinin zəruriliyini göstərir. Dövlət başçısı bunu Tacikistanın xarici işlər naziri Sirocəddin Muhriddinlə görüşdə bildirib.

Mirziyoyev Tacikistanla münasibətlərin inkişafının prezidentliyinin ilk günlərindən prioritet olduğunu qeyd edib. Onun sözlərinə görə, bu dövrdə tərəflər ikitərəfli əlaqələrin möhkəmləndirilməsi istiqamətində əhəmiyyətli iş görüblər.

"Əvvəllər sərhədlər bağlı idi. Nə bu günkü qədər ticarət dövriyyəsi, nə də bu qədər yaxın münasibətlər var idi. Bizə həm də ID kartlarla sərhəd keçidi sisteminin tətbiqini sürətləndirmək lazımdır" deyə prezident bildirib. Dövlət başçısı vurğulayıb ki, yük daşımalarının artması sərhəddən keçidin asanlaşdırılmasına praktiki ehtiyac yaradır. 2024-cü ilin noyabrında Özbəkistanda ID kartla Tacikistana giriş imkanının təqdim edilməsi planlarının olduğu bildirilmişdi.