Daşkənddə ŞƏT üzrə universal təhlükəsizlik mərkəzi yaradılacaq

Özbəkistanın Oliy Məclisinin Qanunvericilik Palatası Şanghay Əməkdaşlıq Təşkilatı (ŞƏT) üzv dövlətlərinin təhlükəsizlik çağırışları və təhdidlərinə qarşı mübarizə üzrə Universal Mərkəzin yaradılması haqqında sazişin ratifikasiyasına dair qanun layihəsini üçüncü oxunuşda qəbul edib. Sənəd Senata göndərilib.

Sazişə 2025-ci il 1 sentyabrda Tianjində imza atılıb. Sazişə görə, mərkəz ŞƏT-in Regional Antiterror Strukturu əsasında Daşkənddə yaradılacaq. Yeni strukturuna həmçinin Bişkekdə yerləşən Informasiya Təhlükəsizliyi Mərkəzi və Transmilli Mütəşkil Cinayətkarlıqla Mübarizə Mərkəzi daxil olacaq.

Mərkəzin əsas vəzifələri səlahiyyətli orqanlar arasında məlumat mübadiləsi, təhlükələrin birgə təhlili, birgə tədbirlərin və praktiki təlimlərin təşkili, habelə mütəxəssislərin hazırlığı və ixtisasının artırılmasının koordinasiyasıdır. Saziş mərkəzin hüquqi statusunu, idarəetmə sistemini, maliyyələşmə qaydasını və üzv dövlətlərin səlahiyyətli orqanları ilə qarşılıqlı əlaqə mexanizmlərini müəyyən edir. Layihənin səbəbi ŞƏT ölkələrinin terrorizmə, ekstremizmə, transmilli mütəşkil cinayətkarlığa və informasiya təhlükəsizliyi təhdidlərinə qarşı əməkdaşlığını gücləndirmək məqsədi kimi göstərilir.