Mirzoyan: TRIPP dəmiryolu sərnişin daşıyacaq

Ermənistanın xarici işlər naziri Ararat Mirzoyan bildirib ki, Trump Marşrutu (TRIPP) çərçivəsində Ermənistan ərazisindən keçən dəmiryolu xətti üzrə sərnişin daşınması həyata keçiriləcək və qatarların dayanacaqları olacaq. APA, Sputnik Ermənistana istinadən xəbər verir.

Mirzoyan bu açıqlamanı TRIPP layihəsi üzrə çərçivə sazişinin ratifikasiyası məsələsini Ermənistan Parlamentinin Xarici Əlaqələr üzrə Daimi Komitəsində təqdim edərkən verib. Nazirin sözlərinə görə, hər iki tərəf üçün faydalı olan TRIPP artıq sülhün möhkəmlənməsinə müsbət iqtisadi təsir göstərir.

Nazir vurğulayıb: "Əgər Çindən nəyisə Azərbaycan ərazisi vasitəsilə dəmir yolu ilə daşıya biliriksə, bunda nə ironiya var? Bəli, Azərbaycanın maraqları var və Ermənistanın da maraqları var. Bu, qarşılıqlı faydalıdır."