Mirzoyan Azərbaycanın şərtindən danışdı

Ermənistanın xarici işlər və xarici ticarət naziri Ararat Mirzoyan Azərbaycanın Ermənistan Konstitusiyasının dəyişdirilməsini tələb etmədiyini, lakin bunu sülh sazişinin imzalanması üçün ilkin şərt kimi irəli sürdüyünü bildirib. Modern.az xəbər verir ki, Mirzoyan bu sözləri parlamentin Xarici əlaqələr komissiyasının iclasında deyib.

Mirzoyanın sözlərinə görə, Azərbaycan Ermənistana Konstitusiyanı dəyişdirmək tələbi qoymur. Onun dediyinə görə, Azərbaycan yalnız iradə nümayiş etdirdiyini, sənədi parafladığını və öhdəlik götürdüyünü, lakin Ermənistan əsas qanununu dəyişdirməyənədək onu imzalamayacağını açıq şəkildə bildirir.

Nazir "tələb" və "ilkin şərt" anlayışlarını bir-birindən fərqləndirmək lazım olduğunu vurğulayıb. Xəbərdə, Ermənistanın Baş naziri Nikol Paşinyanın sentyabr ayında Azərbaycanla Ermənistan Konstitusiyasının dəyişdirilməsi məsələsinin müzakirə olunmadığını bildirdiyi də xatırladılır.