Yaşıl Enerji Dəhlizi üçün texnoloji həllər və təchizat imkanları təqdim edilib

Bakıda “Yaşıl Enerji Dəhlizi”nin həyata keçirilməsi üçün texnoloji həllər və təchizat imkanları təqdim edilib. Energetika Nazirliyinə istinadən “Report” xəbər verir ki, təqdimat Bakıda keçirilən “Yaşıl Enerji Dəhlizi: Texniki-iqtisadi əsaslandırmadan icraya doğru” Forumunda baş tutub və layihənin texnoloji həlləri ilə praktiki icra imkanları müzakirə olunub.

Sessiyanı “Siemens Energy”nin Türkiyə, Mərkəzi Asiya və Qərbi Avropa üzrə vitse-prezidenti Maksim Zubov moderasiya edib. Sessiyada “Jan De Nul”, “Prysmian”, “NKT”, “ZTT”, “Hengtong”, “Hellenic Cable” və “Orient Cable” şirkətlərinin nümayəndələri iştirak edib. Təqdimatlarda yüksək gərginlikli sabit cərəyan (HVDC) texnologiyaları, sualtı elektrik kabellərinin istehsalı və quraşdırılması, EPC xidmətləri və təchizat zəncirinin imkanları diqqət mərkəzində olub.

“Jan De Nul” şirkəti dünyada ilk olan kabel texnologiyasını təqdim edib. Bu texnologiyanın 4 000 metrdən artıq dərinlikdə tətbiq edilə bildiyi bildirilib. Bildirilib ki, texnologiya testlərdən uğurla keçib və effektivliyini sübut edib. Müvafiq maliyyələşmə mexanizmi olarsa, onun Yaşıl Enerji Dəhlizi layihəsində tətbiqi mümkün ola bilər. Sessiya layihənin texnoloji hazırlığının qiymətləndirilməsi və potensial təchizatçılarla əməkdaşlıq imkanlarının müəyyənləşdirilməsi baxımından əhəmiyyətli olub.