Özbəkistan Eldridge Industries ilə mədən və metallurgiya sahəsində əməkdaşlığı genişləndirir

Prezident Şavkat Mirziyoyev oktyabrın 23-də Eldridge Industries şirkətinin həmtəsisçisi, idarə heyətinin sədri və baş icraçı direktoru Todd Boeli ilə görüşüb. Bu barədə prezidentin mətbuat xidməti məlumat verib.

Görüşdə ABŞ-ın bu aparıcı korporasiyası ilə iri kooperasiya layihələrinin həyata keçirilməsi perspektivləri müzakirə olunub. Özbəkistan lideri əməkdaşlığın prioritet istiqamətlərini müəyyən edib: mədən sənayesi, metallurgiya və tikinti sahələrində tərəfdaşlığın genişləndirilməsi, habelə şəhər infrastrukturuna rəqəmsal həllərin tətbiqi nəzərdə tutulur.

Danışıqlar nəticəsində çoxşaxəli əməkdaşlığın daha da inkişaf etdirilməsi üzrə birgə "yol xəritəsi"nin qəbul edilməsi barədə razılığa gəlinib. Eldridge Industries aktivlərin idarə edilməsi, sığorta, daşınmaz əmlak, infrastruktur, texnologiyalar, idman və media sahələrində fəaliyyət göstərən ABŞ-ın investisiya holdinqidir; idarəsində dəyəri 75 milyard dollardan artıq olan aktivlər var.