Paşinyan: Azərbaycanla sülh müqaviləsi mümkün qədər tez imzalanmağa çalışılır

Ermənistan hökumətinin dünənki iclasında Azərbaycanla münasibətlər müzakirə olunub. Baş nazir Nikol Paşinyan hökumətin sülh müqaviləsini mümkün qədər tez imzalamağa çalışdığını və bu prosesi 2031-ci ilə qədər təxirə salmadığını bildirib. O, sənədin həmin tarixə qədər imzalanmasının nəzərdə tutulduğunu, imzalanma və ratifikasiyanın hökumətin siyasi kursunun bir hissəsi olduğunu deyib.

Xarici işlər nazirləri Ceyhun Bayramov və Ararat Mirzoyan «Sülhün və dövlətlərarası münasibətlərin qurulması haqqında» Sazişin razılaşdırılmış mətnini paraflayıblar. Ancaq sazişə hələ imza atılmayıb və ratifikasiya olunmayıb, sərhədin delimitasiyası məsələsi də həll edilməyib.

Paşinyan həmçinin yeni konstitusiya layihəsinin yaxın zamanda dərc olunacağını və ictimai müzakirələrə başlanılacağını bildirib, müxalifətlə razılıq əldə edilmədiyi halda erkən seçkilərin keçirilməsini istisna etməyib. Bakıda keçirilən IV Beynəlxalq Konfransda açıqlanan məlumata görə, Azərbaycan tərəfi Birinci Qarabağ müharibəsində itkin düşən 834 vətəndaşın siyahısını Ermənistana təqdim edib. Saxlanma yerlərində öldüyü bildirilən 54 nəfərdən yalnız 17-sinin meyiti qaytarılıb.