Dövlət Bağçalı: Türkiyə-Azərbaycan etimadının qorunması həyati əhəmiyyətlidir

MHP sədri Dövlət Bağçalı Türkiyə ilə Azərbaycan arasında qarşılıqlı etimadın qorunmasının iki ölkənin həmrəyliyinin davam etdirilməsi və Türk dünyasının ortaq gələcəyi baxımından əvəzolunmaz olduğunu bildirib. APA-nın xəbərinə görə, Bağçalı türk dövlətləri arasındakı münasibətlərin xaricdən formalaşdırılan siyasi layihələrə, geosiyasi hesablamalara və parçalanmaya yönəlmiş planlara sığmayacaq qədər dərin tarixi köklərə malik olduğunu deyib.

Onun sözlərinə görə, Türk dünyasının gələcəyi müstəqil dövlətlərin suverenliyinə, qarşılıqlı hörmətə, bərabərhüquqlu tərəfdaşlığa, etimada və qardaşlıq prinsiplərinə əsaslanır. Gələn həftə Ankarada keçiriləcək Türk Dövlətləri Təşkilatının Zirvə görüşünün ortaq gələcək iradəsinin mühüm təzahürü olacağını bildirib. O, Türkiyə Prezidentinin İlham Əliyevi Ankara sammitinə dəvət etməsinin iki ölkə münasibətlərinin tarixi və strateji əhəmiyyəti baxımından xüsusi önəm daşıdığını qeyd edib.

Bağçalı fərqli yanaşmaların və həllini gözləyən məsələlərin yarana biləcəyini istisna etməyib. Əsas məsələnin bu problemləri qardaşlıq münasibətlərinə xələl gətirmədən, qarşılıqlı anlaşma və birbaşa dialoq yolu ilə həll etmək iradəsi olduğunu vurğulayıb. Onun əlavə etdiyinə görə, Türk dünyasının gücü qarşılıqlı etimad və həmrəylikdən qaynaqlanır, türk dövlətlərinin birliyindən narahat olan qüvvələrin gözləntiləri isə nəticəsiz qalacaq.